終於來到港女我個人頗喜歡的沙田沙角邨介紹！說起沙角邨，其實我跟它可說是有點淵源，因為曾經有一段時間，我經常會去沙角邨的社區中心，每次經過它的樓宇，都會覺得樓宇的命很有心思，而且屋邨設計得相當舒服很好逛，所以港女我對沙角邨多多少少都有點私人感情在內（笑)。
言歸正傳，講返沙角邨嘅歷史。沙角邨最早期已喺 1980 年就入伙，換言之即係已經有 42 年嘅歷史。邨內共有 7 座大廈，包括沙燕樓、銀鷗樓、美雁樓、綠鷺樓、魚鷹樓、金鶯樓以及雲雀樓等。而沙角邨最為標誌嘅建築，就非佢嘅長型連座設計，所以一棟樓宇亦會有分成 A、B、C 座，各座都有有升降機及樓梯，從外觀上以「工」型相連，感覺上都會氣勢磅礡啲。
明眼人相信好快發現，沙角邨嘅中英文樓宇命名係採用較為少見嘅意譯法，而非坊間較為常見嘅音譯法，呢個亦係其中一個原因我好鍾意沙角邨嘅樓宇命名，感覺上亦優雅得多。例如沙燕樓就係 Sand Martin House，綠鷺樓就係 Green Heron House，魚鷹樓就係 Osprey House，美雁樓係 Bean Goose House，金鶯樓係 Oriole House，雲雀樓係 Skylark House，最後銀鷗樓就係 Herring Gull House等等，而每座樓宇門口都會配上當中所屬嘅雀鳥，讓人會心微笑。沙角邨樓宇外牆更都畫上了以「山水飛鳥」主題嘅圖案，昔日雲雀樓外牆更曾有一隻好可愛嘅雀鳥（可惜以前我冇影低佢），但後來日久失修下，雀鳥圖案亦隨之消失。
咁究竟點解沙角邨嘅樓宇都係以雀鳥名稱命名？原來一切都係跟城門河有關係！因為當年為沙角邨樓宇命名嘅時候，屋邨旁邊嘅城門河經常有雀鳥來回飛翔，呢點讓有關部門用上雀鳥名字，同時多多少少都反映咗沙田區內嘅特色。
沙角邨另一樣曾經相當出名嘅地方，相信就係佢嘅冬菇亭。根據昔日報導，沙角邨擁有 3 座冬菇亭，分別經營經營茶餐廳、火鍋店、茶檔及糖水店。但畢竟時間耐咗冬菇亭亦老化，所以後來領展決定翻新冬菇亭，最後唔少食店亦因此而結業。
港女當日到訪沙角邨，見到沙角邨除咗有保留到唔少昔日嘅舊有標誌以及建築，同時亦靜悄悄咁開始有新嘅招牌設計，招牌側更有一啲類似係戶外裝置嘅東西，以及翻新咗嘅商場街市等等。咁在街坊而言，住得舒服安樂當然最緊要，呢種新舊交替亦令我反思，究竟未來嘅沙角邨會係變成點樣呢？
屋邨資料
地點：沙田圍沙角街5號
入伙年份：1980年及1982年
樓宇數目：7
樓宇類型：舊長型、三連座工字型
樓宇名稱：銀鷗樓、雲雀樓、金鶯樓、美雁樓、魚鷹樓、綠鷺樓、沙燕樓
資料來源：維基百科